പ്രേക്ഷകര്‍ ആകാംക്ഷയോടെ കാത്തിരിക്കുന്ന പാന്‍ ഇന്ത്യന്‍ ചിത്രം കബ്‌സ മാര്‍ച്ച് 17-ന് ലോകമെമ്പാടുമുള്ള തിയേറ്ററുകളില്‍ റിലീസ് ചെയ്യും. വന്‍ ബഡ്ജറ്റില്‍ ഒരുങ്ങുന്ന ഈ ചിത്രം കന്നട, തെലുഗു, തമിഴ്, ഹിന്ദി, മലയാളം ഭാഷകളിലാണ് റിലീസ് ചെയ്യുന്നത്. കഴിഞ്ഞ വാരം റിലീസ് ചെയ്ത ചിത്രത്തിന്റെ ട്രെയിലര്‍ വലിയ പ്രേക്ഷക ശ്രദ്ധ പിടിച്ച് പറ്റിയിരുന്നു. ഉപേന്ദ്ര, ശിവരാജ്കുമാര്‍, കിച്ച സുദീപ, ശ്രീയ ശരണ്‍ എന്നിവര്‍ പ്രധാന വേഷങ്ങളിലെത്തുന്ന ചിത്രം സംവിധാനം ചെയ്തിരിക്കുന്നത് ആര്‍. ചന്ദ്രുവാണ്. സ്വാതന്ത്ര്യത്തിന് മുമ്പ് 1940 കാലഘട്ടത്തിലെ ഒരു ഗ്യാങ്ങ്സ്റ്ററുടെ കഥയാണ് ചിത്രം പറയുന്നത്. ചിത്രത്തിന്റെ ട്രെയിലറിലുള്ള സംഘട്ടന രംഗങ്ങള്‍ പ്രേക്ഷകരെ ആവേശത്തിലാക്കുന്നവയായിരുന്നു. 120 കോടിരൂപ മുതല്‍ മുടക്കില്‍ വരുന്ന ചിത്രം നിര്‍മിച്ചിരിക്കുന്നത് ശ്രീ. സിദ്ദേശ്വര എന്റര്‍പ്രൈസസും ഇന്‍വെനിയോ ഒറിജിനും ചേര്‍ന്നാണ്. ഒരു പീരിയഡ് ഗ്യാങ്ങ്സ്റ്റര്‍ ചിത്രമായ കബ്‌സയുടെ ഛായാഗ്രാഹകന്‍ ഏ.ജെ. ഷെട്ടിയാണ്. ചിത്രം കേരളത്തില്‍ വിതരണം ചെയ്യുന്നത് എല്‍.ജി.ഫ് ഫിലിംസ്, ഇ ഫോര്‍ എന്റര്‍ടെയ്ന്‍മെന്റ്‌സ് വഴിയാണ്.